Foi di es manera ki, na data di 28 di Seténbru, Asenbleia Nasional Popular prova Lei Konstitusional nunbru 2/III/90 ki ravoga artigu kuartu di konstituison, institusionaliza prinsípiu di pluralismu y inplanta un nobu mudélu di rijimi pulítiku.
Es Lei, kriadu pa sirbi di instrumentu pa viabilizason di eleisons demokrátiku y pa tranzison pa un nobu mudélu di organizason di vida pulítiku y sosial di país, el ka dexa, entritantu di institui un sistéma diferenti di guvérnu y un otu fórma di di izersísiu di vótu, na véspra di eleisons pa un nobu asenbleia lejislativu.
Foi na es kuadru ki realiza purmerus eleison lejislativu, na Janeru di 1991, sigidu, na Febreru, pa eleisons prizidensial. Un fórti partisipason di populasons na es eleisons dimonstra, klaramenti, opson di país na sentidu di mudansa di rijimi pulítiku.
Entritantu, kel kontestu stóriku partikular undi, através di di revizon parsial di Konstituison, rekonhisidu ma partidus é prinsipais instrumentu di formason di vontadi pulítiku pa guvernason, fase ki demokrasia pluralista kontínua ta konvive ku régras y prinsípius própriu di rijimi antirior.
Manuel Veiga
Manuel Veiga
&via=stc_network)
0 comentários:
Enviar um comentário